حلم العمر او مشروع العمر

بسم اللة الرحمن الرحيم

مشروع العمر 

المشروع سهل جدا و برضة ضخم جدا و ممكن يبدأ ببدايات مختلفة و دة يتوقف على حجم التمويل المتوفر. و طبعا هابدأ بأقل تكلفة الاول. و بعد كدة هانزل وصف المشروع الكبير.

انا ابتديت من حوالى سنة و نص افكر فى مشروع كويس. فكرت فى تسمين المواشى. و قبل ما ابتدى اى حاجة عملت بحث على اسباب خسارة مربى المواشى. لاقيت ان السبب الرئيسى لخسارة المربين هو ارتفاع اسعار الاعلاف. حتى لو هاتزرع برسيم حجازى لان انتاجة برضة بيكون مكلف. ابتديت ادور على طرق حل مشكلة العلف و فعلا وجدت علف سوبر مثالى فى كل شىء بالنسبة لمشروع انتاج اللحوم (مواشى-اغنام-ارانب-دواجن .....).

 ( شجرة المورينجا ) 

نعمة من اللة سبحانة و تعالى بكل المقاييس

و ييطلق عليها اسماء عديدة مثل غصن البان و شجرة الروقان او الحبة الغالية

بذور المورينجا

شتلات المورينجا قبل الزراعة فى الارض

اشجار المورينجا (مسافات الزراعة لانتاج البذور)

شجرة المورينجا المعجزة مبدئيا تتحمل الجفاف و درجات الحرارة المرتفعة و احتياجتها المائية منخفضة و كذلك احتياجتها من السماد قليلة. و السماد الرئيسى لشجرة المورينجا هو روث / سباخ المواشى. او سبلة الفراخ و الطيور عامة... يبقى اصبح فية حياة تكافلية بين انتاج اللحوم و المورينجا.

طيب لو قلت لجنابك ان افضل فدان برسيم حجازى انتاجة ممكن يوصل الى عشرة طن
فى حين ان فدان المورينجا زراعة كثيفة لانتاج العلف بيوصل لمتوسط 250 طن فى السنة
جنابك متخيل فرق الانتاج قد اية !!!!! من 10 طن علف اخضر الى 250 طن علف اخضر!!!!!! و استهلاكك اقل فى (المياة و السماد و العمالة). سبحان اللة الكريم العظيم فعلا.

الاعلاف المركزة (الغالية جدا) عبارة عن علف بة نسبة مرتفعة من البروتين تصل الى 20% ... طيب لو قولت لجنابك ان المورينجا علف مركز ( نسبة البروتين حوالى 25% من وزن ورقة المورينجا )
اضافة الى العديد و العديد من العناصر الغذائية و الفيتامينات اللازمة لرفع المناعة لدى الحيوانات او الطيور او الانسان.

التغذية على المورينجا تسرع دورة تسمين المواشى قرابة 30% من المدة. ( اربعة اشهر بدلا من ستة اشهر).

المورينجا تشفى من قرابة 300 مرض و تنصح بها منظمة الفاو العالمية لاطعام سكان دول المجاعات لما لها من فائدة غذائية هائلة.
و هاعمل بوست مخصوص لشجرة المورينجا من الالف الى الياء لانها عظيمة الفائدة بكل المقاييس.

لما اتوسعت فى البحث فى موضوع المواشى وجدت ان روث المواشى يمكن اعادة تدويرة بحيث ينتج سماد حيوى عالى الجودة بدون رائحة او ميكروبات و يستمر فى الارض لفترة طويلة نوعا ما و كذلك ينتج غاز طبيعى صديق للبيئة و غير ضار للانسان و هو ( غاز الميثان ).

يتم اعادة تدوير روث المواشى ( السباخ) فى خزان يطلق علية خزان البيوغاز

هنا شرح سريع مدعوم بالصور

كلما زاد عدد رؤوس المواشى كلما زاد حجم الغاز الطبيعى المتولد داخل المزرعة و طبعا زاد حجم السماد الحيوى الناتج.

--------------------------------------------------

خليك معايا انا لسة ماخلصتش

حصل ازمة غير متوقعة فى التمويل معايا و بدأت اشوف طريقة تانية ابتدى بيها و تكون اقل تكلفة من المواشى و كانت الدواجن.

مشروع الدواجن مربح جدا لو العلف من عندك و هنا المورينجا  هى الحل المثالى و مكسب تسمين الدواجن متنوع. ربح من تسمين الفراخ نفسها. و الفراخ بيتم تربيتها على فرشة من نشارة الخشب او التبن .. الفرشة دى حضرتك تاخدها و تزرع عليها مشروم اورجانك 100% و بعد المشروم تاخد الفرشة و تستعملها سماد جيد للزرع فى الارض.... يعنى مافيش هالك نهائيا. بالاضافة الى دورة راس المال السريعة بحد اقصى شهرين (مدة الدورة 6 اسابيع و اسبوعين نظافة العنبر بين الدورة و الدورة التالية).

الفراخ الساسو و ليست فراخ بلدى كما يظن البعض

و بكدة يبقى فية تنويع فى الاسمدة اللى بيتسمد بيها الزرع عندك و كمان مجانية سواء المورينجا او اى زرع اخر .. سماد حيوى (لو فية مواشى) و سبلة الفراخ (فرشة العنبر التبن او نشارة الخشب). اما الاسمدة الاخرى ( بوتاسيوم و فوسفات الكالسيوم ) يتم تحضيرهم ايضا طبيعى داخل المزرعة و بتكلفة رخيصة ايضا. و هانزل بوست و فيديوهات ازاى تتعمل الاسمدة.

المشروع جااامد جدا راسمال يبدأ من 200 الف جنية بس. اقل من ثمن شقة. 

و هنا حسبة من ارض الواقع لبدء المشروع 

2 فدان كاش ب 50 الف جنية (8,000 م2 -رى نيلى- كهرباء- مياة شرب). جنبى فى ( طامية-الفيوم) 70كم من ميدان الرماية الجيزة يعنى حوالى 45 دقيقة.  

المرحلة الاولى للمشروع: انتاج اللحوم (فراخ أو بط أو مواشى) على اعلاف مستنبتة لتوفير سماد طبيعى (ببلاش) لزراعة شتلات المورينجا فى الارض المستديمة.

ملحوظة هامة جدا جدا: اسعار الانشاّت و المبانى مرتفعة طبعا لانة فى الصحراء مش فى المدينة ولاكن المهم انك بتدفع الكلام دة مرة واحدة فى العمر تقريبا. ولو عندك حد يقوم بالانشأت ارخص يبقى هايل طبعا.

متوسط تكلفة متر المبانى ( حجر بلوك ابيض+اسمنت+رمل ) متوسط 150ج 

متوسط تكلفة المتر المربع للسقف (صاج اسبستوس مدعوم بعلب صاج) 80ج
متوسط تكلفة صب الارضية مونة شديدة 70ج

- الاستراحة 5×8 = 40 م2 ارضية او سقف 

تكلفة المبانى: 73 م2 × 150ج = 10,950ج
تكلفة السقف: 80 ج × 40 م2 = 3,200ج 

تكلفة الارضية: 70 ج × 40 م2 = 2,800ج

تكلفة الباب متوسط 500ج و تكلفة 3 شباك متوسط 1,000ج

حوض وش + كابينية + حوض مطبخ استانليس متوسط 1,175ج

تكلفة الاستراحة: 10,950 + 3,200 + 2,800 + 500 + 1,000 + 1,200= 19,650 ج

 

صورة الاستراحة قبل السقف و الشبابيك 23/1/2015

- مبنى1: مساحة (80 م2) 5 × 16 ( عنبر مساحة 71 م2 للطيور و بجوارة مخزن مساحة 9 م2)

تكلفة المبانى: 126 م2 × 150ج = 18,900ج

تكلفة السقف: 80 م2 × 80ج = 6,400ج

تكلفة الارضية: 80 م2 × 70ج = 5,600ج

تكلفة الباب متوسط 300ج و تكلفة 20 شباك × 400 ج = 8,000ج

تكلفة المبنى1 : 18,900 + 6,400+ 5,600 + 300 + 8,000 = 39,200 ج
 توجد تكاليف اخرى مثل المساقى و المعالف

- مبنى2: مساحة (80 م2) 5 × 16 ( عنبر مساحة 71 م2 للطيور و غرفة عامل مساحة 9 م2) 

بناء اول عنبر عندى فى الارض 2.5 فدان 3/2016

بناء اول عنبر عندى فى الارض 2.5 فدان 3/2016

اساسيات المزرعة:

تبدأ 1,000ج موتور مياة واحد حصان اتوماتيك + 1500ج ثلاثة تنكات مياة سعة الواحد 1000 لتر + 500ج فلتر مياة 5 مرحلة + 2000ج سباكة + تكلفة الكهرباء (شامل الكابل) 6,000ج
متوسط المبلغ 11,000 ج 

التكلفة الاساسية: الاستراحة + عنبرين +  مخزن + غرفة عامل + الاساسيات

التكلفة الاساسية: 50,000 + 19,650 + 39,200 + 30,000+ 11,000 = 149,850 جنية

-------------------------

كل عنبر يسع متوسط 700 فرخة. او 420 بط بكينى. او 10 عجول.

الدورة 45 يوم للدواجن. الدورة 4 شهور للبط البكينى. الدورة 5 شهور للمواشى.

اصبح مع جنابك مزرعة محترمة جاهزة للتشغيل (تسمين فقط) و لسة معاك 50,150 جنية تكاليف تشغيل العنبرين.... بعد بداية الدورة الاولى بشهر تشترى كتاكيت الدورة التانية للعنبر التانى 

لازم تأجر محل طيور (مفروش) و تبيع فية الانتاج بتاعك.. بدون المحل تجار الجملة هايمصوا دمك و مش هاتلاقى عائد مجزى

-------------------------

مكسب الطيور مش تسمين بس .. الفرشة بتاعت العنبر(نشارة خشب او تبن) بتتاخد اخر الدورة و يتزرع عليها مشروم اورجانك. بعد المشروم بتستخدم نفس الفرشة كسماد ممتاز فى زراعة الارض. و دى المرحلة التانية من المشروع و تبدأ بعد نهاية اول دورة فراخ او بط بكينى.

المكسب الحقيقى يوم مايكون العلف من انتاجك و اسمدة الزراعة ايضا من انتاجك و ذلك غالبا خلال متوسط 6 شهور من يوم شراء الارض. غير اعادة تدوير مخلفات المزرعة لانها جزء اساسى من ارباح المشروع و طبعا هاشرح ازاى فى بوست مستقل لانة موضوع مربح فعلا و سهل جدا.

-------------------------

بقول تانى : اسعارالتأسيس مرتفعة طبعا لانة فى الصحراء مش فى المدينة ولاكن المهم انك بتدفع الكلام دة مرة فى العمر تقريبا. 

تعالى جنبى الارض 70كم او 45 دقيقة من ميدان الرماية الجيزة. انا مش بهزر ولا بورط حد لاسمح اللة. الارض قريبة جدا جدا من الارياف (عمالة متوفرة على مدار العام) و محلات كتير لاى حاجة تخص المزارع. و قريبة جدا برضة لاسواق التوزيع ( 6 اكتوبر - الجيزة - القاهرة ) ولو جنابك مستثمر كبير ممكن تشتغل تصدير عن طريق مطار 6 اكتوبر لانة يعتبر قريب.

تقعد معايا فى الاستراحة لحد ما تبنى استراحتك و تباشر تنفيذ كل حاجة بنفسك. و هارشدك لاماكن بيع تجهيزات و مستلزمات المزارع باسعار الجملة. 

دة مشروعى اللى ابتديت فعلا انفذة و اللة المستعان.

موقع الارض طامية-الفيوم

الاستراحة بعد تركيب السقف الصاج على علب صاج 4 × 6


البوست الجاى نتكلم عن المشروع ككل و خطوات بداية الشغل 

لو المشروع مش مناسب ليك ياريت تعمل شير لانة اكيد مناسب لناس تانية و الدال على الخير كفاعلة